Aug 27 2019 | 14:20 PM

عبد الباقي يُبارز المتني في التحدي الزجلي الثاني

يُعطي موقع جبل لبنان حيّزا هاما للتراث الشعبي، خصوصا الزجل الذي يحظى بشعبية واسعة في لبنان.
وإيمانا منّا بدور هذا التراث، يسرُّ موقع جبل لبنان بالتعاون مع موقع بيت القصيد ان يقدم إلى قرّائه فقرة زجلية اسبوعية يقدم خلالها مباريات مكتوبة تجمع شعراء من مختلف المناطق اللبنانية.
ويقدم الموقع المباراة الزجلية الثانية بالتعاون مع صفحة بين القصيد على الفايسبوك، وتجمع بين الشاعرين، عهد المتني، ووسام عبد الباقي


المتني :
 قرّادي
عبد الباقي بأنشادو 
لما طموحاتو زادو 
بدايرة نفوس الشعار 
عطيتو شهادة ميلادو

عرفتك من دون شك وريب
صياد واسمك مشهور 
ان قوصت الطلقة عن صيب 
بيوقع اربع خمس طيور 
وهلق بالطلقة ال بالجيب 
يمكن تستطدلك عصفور 
والنسر الكاسيه الشيب 
مش رح تقدر تصطادو
******************

عبد الباقي
المتني زاد من عنادو
عنادو ضَرّو وما فادو
وعبد الباقي بكار الشعر
تعوّد ما يقسي ولادو

ان كنّو عـ حدود الغيمات
النسر الشايب بـيلالي
بيحسب حالو من الأموات
عالأرض ان شاف خيالي

نيشاني صار حكايات
وكِتفي الغالي رسمالي
بعياري بطال النجمات
لو مرّة عليي تمادو


 المتني
الشب الجفتو عالكتفين 
متلك داير ليل نهار 
بيعمل من طير البوحنين 
لقمة زاد بقلب الدار 
وزادي العم بيرجح عين
عملتو من صيد الأفكار 
بيبقى الفارق واضح بين 
زاد الأفكار وزادوو
***************

عبد الباقي
لا مش متلَك بو فَردَيّن 
عرفوني من كنت زغير 
لو ما عليها حجاب العين 
بحرّم فوقي طير يطير 

في لي بعنق المغنى دين 
ومش بشهادة غيري كبير 
بسّ ال عا شكلَك بو حنين 
مـا بـيشَبّع صَـــيّادو
******************

المتني 
معنّى
يا موهبه لما عهد ايدك خطب
عهدو عطاكي يضل سيد من خطب
وحيث العفو من منهجي مابينشطب
رح بقنع المنشار يعطف ع الحطب
غيري يا بو محمود في بيت انقطب
قطبة خفية شعرك الراقي عطب
وجرحك قطبتو وعهد جايي بهالمسا
يتطمن علا الجرح ويفك القطب
***************

عبد الباقي
يا مرحبا بالموهبه المهذَّبي
المأهَبه عا سلاحها بهالتجربه
عا ملعَبي لو جيت تكشَخ بالعِبي
رح تقشع منامات سودا ومرعِبه
عفوك شو عندو عا سيوف مذهَّبي
لعشفارها عِليت صوات الحوربه
ايا قُطَب جايي ل عندي تفكِها
اصحى ع حالك روْق واعقَل يا صبي
************

المتني
بفك القطب مش مقصدي فك الرقاب
جايي تا اوقف حدك بأيا مصاب
فَك الحداد..الغيم واخضرّوا العشاب
وفَكو النوابغ عقدة حروف الكتاب
وحيثك عدت عاضيعتك بعد الغياب
صيف وشتي بالبيت لا تقفّل بواب
فك القفل عن بابك ولاقي الضيوف
ب اهلا وسهلا بالصبايا وبالشباب
*************

عبد الباقي
لما الامن عن موطني المسكين غاب
حسيت حالي بهالدني عايش بِغاب
وين غلُطت بتشوفني ووين العُجاب
لو حمَيت حالي من الأفاعي والذياب
سكّرت بابي وفتَحت باب السَحاب
ودعيت كل حبابنا للإنتِساب
بحزب الوطن تَنصير رزمة واحِده
ونترُك وِزر افعالنا ليوم الحساب
***********

المتني
لا تسكر بوابك بنبع الحب فيض 
وحارب ظلام الكفر لنو بالوميض
ما بقبل الاحزاب والفكر المريض 
يخلو شعب جبار عايش بالحضيض 
افتح بواب العلم واتحدى النقيض 
وخلي اللي متلك حاملين كفوف بيض
يتجاوزوا حدود الوطن حتى الوطن
يدخل على التاريخ من بابو العريض
**********

عبد الباقي
أيا عِلم يا صاحبي بشوفو زَهيد
لو مـا بـِقلب ورب غنيّنا النَشيد

ان مـَ تعمّد الدستور بـِ دم الشهيد
ما بتِقشع الأوطان فيها نهار عيد

وتنصير بسْوات الخليقة عالأكيد
بدنا شي سجن كبير وسلاسل حديد
نقيّد رقاب الـ بالعِباد تحَكّمو
ونبني وطن امجاد للجيل الجديد
..
خطيي بلدنا صار عايش عالنهيد
دخلك يا ربي ابعثلنا حاكم رَشيد
*********


المتني
قيّد نوايا الشر بنفوس الزغار
ولا تقيد الافكار بمخوخ الكبار
ولا تحرم الاغصان من سحر الكنار 
ولا لا تكتّف نسر فوق الغيم طار
وعا سيرة الجيل الجديد بكل دار 
بنت وصبي لو تحرروا بيبدا العمار
ولو تقيدوا رح يغلطوا وقالوا البشر 
كتر الضغط ولع فتيل الانفجار
************

عبد الباقي
عيوني عليك بهالمسا عم يدمَعو
ما كنت ناطر هالحَكي تا إسمَعو

النسر الطليق جوانحو لعم يلمَعو
هيذا فؤادي وكيف بدي اقمَعو

جيل الشباب الـ كل عاطفتي مَعو
ما بلوم والله غير يللي طمَّعو

ما بوجَعو لولا هَديتو عالصحيح
بس التَحرر عالاكيد بيوجَعو
***********
المتني 
 قصيد
ياليل الشعر لا تنعّس عيوني
ولا تسمح للغفا يقيّد جفوني 
انكنو لهفتي عتمك ما راعا 
لا تحرمني من البيناصرووني
انا طير البلاغة والبراعه
على غصوني رياشي بينقلوني
وجودي بالقفص لولا تداعا
عكتر الشوق رح تدبل غصوني
واذا الشاعر تقيد بالصناعه
بيصبح عامنابرنا المصوني 
متل بياع عمعيرض بضاعه
مِنها طالعة ريحة عفووني
انا رب التحرر ياجماعة
ويلي متل فضلي يتبعوني
بشرط مانوصل لعصر الخلاعه
وننسا شو عِطينا الأصل موونه
التحرر بالصحافة والاذاعة
على كل الخفايا عرّفوني
التحرر بالتجارة وبالزراعة
حمي الاوطان من دَور السخوني
وبفلسطين بديار الشفاعة
قالت ياعرب لا تواخذووني
رح تبقى ضمايركن مباعة 
اذا من الكفر ما بتحرروني
وحتى بالدمع عندي قناعة
بلحظات القساوة والليونة
اذا ما حررو جفن الوداعة
شو قيمة دمعة الام الحنووني
ويا بو محمود واقع مش اشاعة
وَصّوني معك اكبح جنوني 
وخلي العفو يحكم بالشجاعة 
لانو الناس هون بيعرفوني 
كنت بنهي الحوار بربع ساعة 
لوما واجبي شجع طموحك 
ورد جميل كل الشجعوووني
***

عبد الباقي
يا مَتني الشعر مش عجقة قوافي
وسخافة ان كنت بسكت عالسخافِة 
إذا ما صرت للإبداع منبر
حرام تشوّه صروح الثقافِة

مـَ في كلّاس عالطحان غَبّر 
ولا في فزعان تحت لحاف غافي 
بَلا ما تزوّر التاريخ أخبر
السواقي بتربح جميل الضفافي

قمر نيسان عَنّي راح خبّر 
وكثر ما حب إسمو عا شفافي
غِبت يومين ع فراقي تصبّر
ترجّى الليل ت يقلّي عوافي

ولولا قلت منّي إنت اشعر
قالوها كثار طلعو عا كتافي
وقدر م تشوف جنحك هون وبّر 
لسانك قِدّتو عنق الزرافة

وإذا عليي ال مثل فضلك تجَبَّر
ما ظني يوم رح إحمل مخافه
عندما جيت شفتك عالمكبّر
لقيتو فيك نور العقل طافي

ضوَيتك دمعَك بعينَك تصبّر
وتا سَلي فيك طلّاب المنابر 
حَرقتك متل شي ساعة إضافة